Aвиотретирање за уништување на гасениците од боровиот четник
Министерството за земјоделство, шумарство и водостопанство од денеска до 5 октомври, ќе врши авиотретирање за уништување на гасениците од боров четник. Акцијата ќе почне во шумското стопанство „Осогово“ од Крива Паланка каде против овој штетник ќе бидат испрскани 2.000 хектари борова шума.
Како што соопшти Министерството, прскањето ќе се врши во раните утрински или во доцните попладневни часови, зависно од временските услови. За времето на третирање или евентуалното одложување на акцијата, населението и пчеларите ќе бидат информирани преку локалните медиуми.
Денеска и утре авиотретирање на боровата шума ќе се врши во кривопаланечкиот регион во локалитетите Паклиште - Глабочица, Петралица и Станча. Пчеларите ќе можат да ги пуштат пчелите најмногу еден час и половина по авиотретирањето.
Акцијата за уништување на боровиот четник ќе продолжи во четврток, на 9 септември, во битолскиот регион, каде до 11 септември ќе се третираат 2.500 хектари борова шума во шумските стопанства „Кајмакчалан“ и во Националниот парк „Пелистер“.
Со годинашната акција за уништување на гасениците од боровиот четник со авиотретирање ќе бидат опфатени 14.150 хектари на целата територија на Република Македонија каде боровата шума е погодена од овој штетник.
http://www.sitel.com.mk/dnevnik/makedon ... ot-chetnik" onclick="window.open(this.href);return false;